Psalms 99:7
Westminster Hebrew Morphology
יְהוָה מָלָךְ יִרְגְּזוּ עַמִּים יֹשֵׁב כְּרוּבִים תָּנוּט הָאָֽרֶץ׃ |
||
יְהוָה בְּצִיֹּון גָּדֹול וְרָם הוּא עַל־כָּל־הָֽעַמִּֽים׃ |
||
יֹודוּ שִׁמְךָ גָּדֹול וְנֹורָא קָדֹושׁ הֽוּא׃ |
||
וְעֹז מֶלֶךְ מִשְׁפָּט אָהֵב אַתָּה כֹּונַנְתָּ מֵישָׁרִים מִשְׁפָּט וּצְדָקָה בְּיַעֲקֹב׀ אַתָּה עָשִֽׂיתָ׃ |
||
רֹֽומְמוּ יְהוָה אֱלֹהֵינוּ וְֽהִשְׁתַּחֲווּ לַהֲדֹם רַגְלָיו קָדֹושׁ הֽוּא׃ |
||
מֹשֶׁה וְאַהֲרֹן׀ בְּֽכֹהֲנָיו וּשְׁמוּאֵל בְּקֹרְאֵי שְׁמֹו קֹרִאים אֶל־יְהוָה וְהוּא יַעֲנֵֽם׃ |
||
בְּעַמּוּד עָנָן יְדַבֵּר אֲלֵיהֶם שָׁמְרוּ עֵדֹתָיו וְחֹק נָֽתַן־לָֽמֹו׃ |
||
יְהוָה אֱלֹהֵינוּ אַתָּה עֲנִיתָם אֵל נֹשֵׂא הָיִיתָ לָהֶם וְנֹקֵם עַל־עֲלִילֹותָֽם׃ |
||
רֹֽומְמוּ יְהוָה אֱלֹהֵינוּ וְהִֽשְׁתַּחֲווּ לְהַר קָדְשֹׁו כִּֽי־קָדֹושׁ יְהוָה אֱלֹהֵֽינוּ׃ |