Psalms 76:5
Westminster Hebrew Morphology
לַמְנַצֵּחַ בִּנְגִינֹת מִזְמֹור לְאָסָף שִֽׁיר׃ |
||
נֹודָע בִּֽיהוּדָה אֱלֹהִים בְּיִשְׂרָאֵל גָּדֹול שְׁמֹֽו׃ |
||
וַיְהִי בְשָׁלֵם סֻכֹּו וּמְעֹונָתֹו בְצִיֹּֽון׃ |
||
שָׁמָּה שִׁבַּר רִשְׁפֵי־קָשֶׁת מָגֵן וְחֶרֶב וּמִלְחָמָה סֶֽלָה׃ |
||
נָאֹור אַתָּה אַדִּיר מֵֽהַרְרֵי־טָֽרֶף׃ |
||
אֶשְׁתֹּולְלוּ׀ אַבִּירֵי לֵב נָמוּ שְׁנָתָם וְלֹא־מָצְאוּ כָל־אַנְשֵׁי־חַיִל יְדֵיהֶֽם׃ |
||
מִגַּעֲרָתְךָ אֱלֹהֵי יַעֲקֹב נִרְדָּם וְרֶכֶב וָסֽוּס׃ |
||
אַתָּה׀ נֹורָא אַתָּה וּמִֽי־יַעֲמֹד לְפָנֶיךָ מֵאָז אַפֶּֽךָ׃ |
||
מִשָּׁמַיִם הִשְׁמַעְתָּ דִּין אֶרֶץ יָֽרְאָה וְשָׁקָֽטָה׃ |
||
בְּקוּם־לַמִּשְׁפָּט אֱלֹהִים לְהֹושִׁיעַ כָּל־עַנְוֵי־אֶרֶץ סֶֽלָה׃ |
||
כִּֽי־חֲמַת אָדָם תֹּודֶכָּ שְׁאֵרִית חֵמֹת תַּחְגֹּֽר׃ |
||
נִֽדֲרוּ וְשַׁלְּמוּ לַיהוָה אֱֽלֹהֵיכֶם כָּל־סְבִיבָיו יֹובִילוּ שַׁי לַמֹּורָֽא׃ |
||
יִבְצֹר רוּחַ נְגִידִים נֹורָא לְמַלְכֵי־אָֽרֶץ׃ |