Psalms 65:3
Westminster Hebrew Morphology
לַמְנַצֵּחַ מִזְמֹור לְדָוִד שִֽׁיר׃ |
||
לְךָ דֻֽמִיָּה תְהִלָּה אֱלֹהִים בְּצִיֹּון וּלְךָ יְשֻׁלַּם־נֶֽדֶר׃ |
||
שֹׁמֵעַ תְּפִלָּה עָדֶיךָ כָּל־בָּשָׂר יָבֹֽאוּ׃ |
||
דִּבְרֵי עֲוֹנֹת גָּבְרוּ מֶנִּי פְּשָׁעֵינוּ אַתָּה תְכַפְּרֵֽם׃ |
||
אַשְׁרֵי׀ תִּֽבְחַר וּתְקָרֵב יִשְׁכֹּן חֲצֵרֶיךָ נִשְׂבְּעָה בְּטוּב בֵּיתֶךָ קְדֹשׁ הֵיכָלֶֽךָ׃ |
||
נֹורָאֹות׀ בְּצֶדֶק תַּעֲנֵנוּ אֱלֹהֵי יִשְׁעֵנוּ מִבְטָח כָּל־קַצְוֵי־אֶרֶץ וְיָם רְחֹקִֽים׃ |
||
מֵכִין הָרִים בְּכֹחֹו נֶאְזָר בִּגְבוּרָֽה׃ |
||
מַשְׁבִּיחַ׀ שְׁאֹון יַמִּים שְׁאֹון גַּלֵּיהֶם וַהֲמֹון לְאֻמִּֽים׃ |
||
וַיִּירְאוּ׀ יֹשְׁבֵי קְצָוֹת מֵאֹותֹתֶיךָ מֹוצָֽאֵי־בֹקֶר וָעֶרֶב תַּרְנִֽין׃ |
||
פָּקַדְתָּ הָאָרֶץ׀ וַתְּשֹׁקְקֶהָ רַבַּת תַּעְשְׁרֶנָּה פֶּלֶג אֱלֹהִים מָלֵא מָיִם תָּכִין דְּגָנָם כִּי־כֵן תְּכִינֶֽהָ׃ |
||
תְּלָמֶיהָ רַוֵּה נַחֵת גְּדוּדֶיהָ בִּרְבִיבִים תְּמֹגְגֶנָּה צִמְחָהּ תְּבָרֵֽךְ׃ |
||
עִטַּרְתָּ שְׁנַת טֹובָתֶךָ וּמַעְגָּלֶיךָ יִרְעֲפוּן דָּֽשֶׁן׃ |
||
יִרְעֲפוּ נְאֹות מִדְבָּר וְגִיל גְּבָעֹות תַּחְגֹּֽרְנָה׃ |
||
לָבְשׁוּ כָרִים׀ הַצֹּאן וַעֲמָקִים יַֽעַטְפוּ־בָר יִתְרֹועֲעוּ אַף־יָשִֽׁירוּ׃ |