Psalms 108:7
Westminster Hebrew Morphology
שִׁיר מִזְמֹור לְדָוִֽד׃ |
||
נָכֹון לִבִּי אֱלֹהִים אָשִׁירָה וַאֲזַמְּרָה אַף־כְּבֹודִֽי׃ |
||
עוּרָֽה הַנֵּבֶל וְכִנֹּור אָעִירָה שָּֽׁחַר׃ |
||
אֹודְךָ בָעַמִּים׀ יְהוָה וַאֲזַמֶּרְךָ בַּל־אֻמִּֽים׃ |
||
כִּֽי־גָדֹול מֵֽעַל־שָׁמַיִם חַסְדֶּךָ וְֽעַד־שְׁחָקִים אֲמִתֶּֽךָ׃ |
||
רוּמָה עַל־שָׁמַיִם אֱלֹהִים וְעַל כָּל־הָאָרֶץ כְּבֹודֶֽךָ׃ |
||
לְמַעַן יֵחָלְצוּן יְדִידֶיךָ הֹושִׁיעָה יְמִֽינְךָ וַעֲנֵֽנִי׃ |
||
אֱלֹהִים׀ דִּבֶּר בְּקָדְשֹׁו אֶעְלֹזָה אֲחַלְּקָה שְׁכֶם וְעֵמֶק סֻכֹּות אֲמַדֵּֽד׃ |
||
לִי גִלְעָד׀ לִי מְנַשֶּׁה וְאֶפְרַיִם מָעֹוז רֹאשִׁי יְהוּדָה מְחֹקְקִֽי׃ |
||
מֹואָב׀ סִיר רַחְצִי עַל־אֱדֹום אַשְׁלִיךְ נַעֲלִי עֲלֵֽי־פְלֶשֶׁת אֶתְרֹועָֽע׃ |
||
מִי יֹבִלֵנִי עִיר מִבְצָר מִי נָחַנִי עַד־אֱדֹֽום׃ |
||
הֲלֹֽא־אֱלֹהִים זְנַחְתָּנוּ וְֽלֹא־תֵצֵא אֱלֹהִים בְּצִבְאֹתֵֽינוּ׃ |
||
הָֽבָה־לָּנוּ עֶזְרָת מִצָּר וְשָׁוְא תְּשׁוּעַת אָדָֽם׃ |
||
בֵּֽאלֹהִים נַעֲשֶׂה־חָיִל וְהוּא יָבוּס צָרֵֽינוּ׃ |