Psalms 101:1
Westminster Hebrew Morphology
לְדָוִד מִזְמֹור חֶֽסֶד־וּמִשְׁפָּט אָשִׁירָה לְךָ יְהוָה אֲזַמֵּֽרָה׃ |
||
אַשְׂכִּילָה׀ בְּדֶרֶךְ תָּמִים מָתַי תָּבֹוא אֵלָי אֶתְהַלֵּךְ בְּתָם־לְבָבִי בְּקֶרֶב בֵּיתִֽי׃ |
||
לֹֽא־אָשִׁית׀ לְנֶגֶד עֵינַי דְּֽבַר־בְּלִיָּעַל עֲשֹֽׂה־סֵטִים שָׂנֵאתִי לֹא יִדְבַּק בִּֽי׃ |
||
לֵבָב עִקֵּשׁ יָסוּר מִמֶּנִּי רָע לֹא אֵדָֽע׃ |
||
מְלֹושְׁנִי מְלָשְׁנִי בַסֵּתֶר׀ רֵעֵהוּ אֹותֹו אַצְמִית גְּֽבַהּ־עֵינַיִם וּרְחַב לֵבָב אֹתֹו לֹא אוּכָֽל׃ |
||
עֵינַי׀ בְּנֶֽאֶמְנֵי־אֶרֶץ לָשֶׁבֶת עִמָּדִי הֹלֵךְ בְּדֶרֶךְ תָּמִים הוּא יְשָׁרְתֵֽנִי׃ |
||
לֹֽא־יֵשֵׁב׀ בְּקֶרֶב בֵּיתִי עֹשֵׂה רְמִיָּה דֹּבֵר שְׁקָרִים לֹֽא־יִכֹּון לְנֶגֶד עֵינָֽי׃ |
||
לַבְּקָרִים אַצְמִית כָּל־רִשְׁעֵי־אָרֶץ לְהַכְרִית מֵֽעִיר־יְהוָה כָּל־פֹּעֲלֵי אָֽוֶן׃ |