نمایش موازی مراثی ارمیا 5:9
Presets: [OT Scholar][NT Scholar] Link to this view
با نماێش موازی شما میتوانید جند ترجمهها باهم در یک صفحه ببینید
| Westminster Hebrew Morphology | |
|---|---|
| 1 זְכֹר יְהוָה מֶֽה־הָיָה לָנוּ הַבֵּיט הַבִּיטָה וּרְאֵה אֶת־חֶרְפָּתֵֽנוּ׃ | |
| 2 נַחֲלָתֵנוּ נֶֽהֶפְכָה לְזָרִים בָּתֵּינוּ לְנָכְרִֽים׃ | |
| 3 יְתֹומִים הָיִינוּ אֵין וְאֵין אָב אִמֹּתֵינוּ כְּאַלְמָנֹֽות׃ | |
| 4 מֵימֵינוּ בְּכֶסֶף שָׁתִינוּ עֵצֵינוּ בִּמְחִיר יָבֹֽאוּ׃ | |
| 5 עַל צַוָּארֵנוּ נִרְדָּפְנוּ יָגַעְנוּ לֹא וְלֹא הֽוּנַח לָֽנוּ׃ | |
| 6 מִצְרַיִם נָתַנּוּ יָד אַשּׁוּר לִשְׂבֹּעַֽ לָֽחֶם׃ | |
| 7 אֲבֹתֵינוּ חָֽטְאוּ אֵינָם וְאֵינָם אֲנַחְנוּ וַאֲנַחְנוּ עֲוֹנֹתֵיהֶם סָבָֽלְנוּ׃ | |
| 8 עֲבָדִים מָשְׁלוּ בָנוּ פֹּרֵק אֵין מִיָּדָֽם׃ | |
| 9 בְּנַפְשֵׁנוּ נָבִיא לַחְמֵנוּ מִפְּנֵי חֶרֶב הַמִּדְבָּֽר׃ | |
| 10 עֹורֵנוּ כְּתַנּוּר נִכְמָרוּ מִפְּנֵי זַלְעֲפֹות רָעָֽב׃ | |
| 11 נָשִׁים בְּצִיֹּון עִנּוּ בְּתֻלֹת בְּעָרֵי יְהוּדָֽה׃ | |
| 12 שָׂרִים בְּיָדָם נִתְלוּ פְּנֵי זְקֵנִים לֹא נֶהְדָּֽרוּ׃ | |
| 13 בַּחוּרִים טְחֹון נָשָׂאוּ וּנְעָרִים בָּעֵץ כָּשָֽׁלוּ׃ | |
| 14 זְקֵנִים מִשַּׁעַר שָׁבָתוּ בַּחוּרִים מִנְּגִינָתָֽם׃ | |
| 15 שָׁבַת מְשֹׂושׂ לִבֵּנוּ נֶהְפַּךְ לְאֵבֶל מְחֹלֵֽנוּ׃ | |
| 16 נָֽפְלָה עֲטֶרֶת רֹאשֵׁנוּ אֹֽוי־נָא לָנוּ כִּי חָטָֽאנוּ׃ | |
| 17 עַל־זֶה הָיָה דָוֶה לִבֵּנוּ עַל־אֵלֶּה חָשְׁכוּ עֵינֵֽינוּ׃ | |
| 18 עַל הַר־צִיֹּון שֶׁשָּׁמֵם שׁוּעָלִים הִלְּכוּ־בֹֽו׃ פ | |
| 19 אַתָּה יְהוָה לְעֹולָם תֵּשֵׁב כִּסְאֲךָ לְדֹר וָדֹֽור׃ | |
| 20 לָמָּה לָנֶצַח תִּשְׁכָּחֵנוּ תַּֽעַזְבֵנוּ לְאֹרֶךְ יָמִֽים׃ | |
| 21 הֲשִׁיבֵנוּ יְהוָה׀ אֵלֶיךָ וְנָשׁוּב וְֽנָשׁוּבָה חַדֵּשׁ יָמֵינוּ כְּקֶֽדֶם׃ | |
| 22 כִּי אִם־מָאֹס מְאַסְתָּנוּ קָצַפְתָּ עָלֵינוּ עַד־מְאֹֽד׃ | |
